الكاتب أحمد جابر يتحدث للعاصمة اآلان

كتبت/ آية نور

س/ حدثنا عن سيرتك الذاتية؟

- أحمد جابر كاتب مصري معاصر اتخرجت من كلية الأداب جامعة حلوان 

كتبت روايتين الأولى كانت بإسم "حياة" والثانية بإسم "زهرة هاديس"

س/ متي اكتشفت قدرتك الإبداعية في الكتابة؟

- يمكن الموضوع بدأ معايا بدري شوية في فترة الثانوية العامة 

كنت بكتب قصص قصيرة باللغه العامية 

كنت بكتب خواطر وجمل نثرية بالفصحى 

وفي البداية مكنتش ملاحظ ده بس مع الوقت بدأت الاحظ اني بكتب كويس

بقيت أقارن ما بين اللي بكتبه بشكل عشوائي واللي الكتاب بيكتبوه في الكتب 

لحد ما فكرت في فكرة أول رواية ليا عن طريق قصة قصيرة كنت كاتبها وكملت واصبحت رواية "حياة"

س/ حدثنا عن العمل الاول لك باستفاضة وماذا يحمل بداخله؟

-أول رواية ليا كانت بإسم "حياة" وهي كانت عبارة عن قصة قصيرة بكتبها من وقت الثانوية العامة تقريبا وخدت مني وقت كبير تقريبا 3 سنين لاني كنت في البداية ، يعني اكتب فيها شوية واقول لا انا مش كاتب وارجعلها تاني واقول يمكن ليه لا لحد ما جت الفرصة وخرجت للنور في معرض القاهرة الدولي للكتاب 2022 

لكن اللى اقدر اقول عنها البداية الحقيقية كانت رواية زهرة هاديس المتاحة حالياً في معرض القاهرة الدولي للكتاب 2025 بشكل انضج وافضل واسلوب كتابة وصياغة فيه نضج اكبر من اول رواية .

س/ أود أن أري بعض الاقتباسات من كتاباتك؟

-بما ان زهرة هاديس هي اللي موجودة حاليا في المعرض فخليني اكتب بعض الاقتباسات منها 

""الحياة ليست عادلة، لكنها ليست عديمة القيمة. نحن من نُضفي على اللحظات معناها، ونحن من نحرمها من عمقها حين نتجاهلها. أفكر أحيانًا أن أكبر خديعة وقعنا فيها هي أن نعيش على الهامش، منتظرين تلك اللحظة الكبرى التي لن تأتي"".

"إياك أن تطرُق أبواباً لا تعلم ما خلفها ولا تعلم ما تُخبيء لك من مصائب لا تأتي فُرادى" .

""كيف رسّخ كاتبها المُفضل فلسفته ودسها كالسموم بعقلها حتى أصبحت تفكر بطريقة كتاباتهُ ، هناك كانت تلعب وتتغمز ، تصيح فرحاً ، هُنا فى المنتصف على تلك السجاده الدائريه المنقوش عليها رسمة الراقصه الهنديه وبجانبها ذلك القرد الضاحك ، أمام باب المنزل مُباشرةً كانت تلوح لى فى حُزنٍ بعد الإعلان عن رحيلى اليوم ، واليوم علمت كيف حاولت التخلص من هاديس وزهرتهُ ""

س/ كيف تستغل وقت فراغك؟

-جزء منها بيكون في القراءة عشان اقدر اغذي عقلي كويس بمعلومات وقصص جديدة 

جزء من وقتي بكون حابب انه يكون مع اسرتي لان دي حاجة بالنسبالي مهمة جداً 

في زمن وقت الفراغ فيه بقى اقل كتير عن زمان 

س/حدثنا عن أول عمل أدبي يحمل أسمك؟

-انا اتكلمت في السؤال الأول عن رواية حياة خليني اتكلم شوية عن رواية "زهرة هاديس" واللي بالمناسبة موجودة حالياً في معرض القاهرة الدولي للكتاب 2025 صالة 4 جناح B4 دار سين للنشر والتوزيع داخل جناح اخبار اليوم 

الرواية دي انا تعبت فيها جداً بحيث المعلومات اللى قدرت اوفرها بجانب الجزء الخيالي اللي كان تحدي جديد بالنسبالي واني اقدر اوصف كل حاجه في عقلي واوصف اكتر من عالم داخل عقلي في اكتر من زمن مختلف عن غيرو وازاي اقدر اصور كل زمن بنفس الشكل اللي كان فيه ده خد مني مجهود كبير بالرغم ان وقت كتابة الرواية كان اقل كتير من "حياة" لكن الحقيقة انا بميل كعمل ادبي متكامل لرواية "زهرة هاديس" اللى بتتكلم عن محمد صبري بطل الرواية ورحلته داخل مكان بيأثر عليه ويكون سبب في إنه يعيش في عدد من الأزمنة عشان يوصًل بطل العمل لهدف مُحدد بنعرفه في النهاية عن طريق تكوين الازمنة والعوالم دي وأحياناً الكائنات اللي بيشوفها محمد ، الرواية من نوع الفانتازيا وفيها شوية رعب كدا واحداث تاريخية ومعلومات حلوة جداً رغم ان شهادتي مجروحة فيها طبعاً . 

س/من هو الكاتب الذي تأثرت به في بدايتك؟

-كتير طبعاً يعني لو هناخد من الأقدم للأحدث فخلينا نتكلم عن العالمي نجيب محفوظ ، وطه حسين ، العقاد 

دكتور أحمد خالد توفيق ، أحمد مراد .

س/هل من مؤلفات قادمة مستقبلاً؟ 

-أكيد إن شاء الله وأتمنى يكون عملين كمان مش عمل واحد في 2025 ومعرض القاهرة الدولي للكتاب 2026 

س/من الذي دعمك وشجعك لتصل إلى ما انت عليه الآن؟

-والدي ووالدتي "الله يرحمهم" كان ليهم فضل كبير عليا في ده طبعاً بعد ربنا سبحانه وتعالى ودعمهم مكنش له حدود 

وحالياً زوجتي أكتر حد مش بس بيشجعني ويدعمني هي كمان بتساعدني وبتوفرلي البيئة والوقت والمساحة اللي أقدر أكتب فيه .

س/ألم تفكر في كتابة مذكراتك؟

-لسه بدري جداً عن الكلام ده بس لو فكرت اني اكتب مذكراتي في يوم هتبقى عبارة عن رواية . 

س/ هل تعرضت من قبل لشئ احبطك في مجالك؟

-مفيش حد مش بيتعرض لده في مرحلة معينة في حياته خصوصا ان التجربة الأولى مع رواية حياة مكنتش احسن حاجة مع دار النشر اللى كنت بتعامل معاها وتم فسخ التعاقد ودي بالنسبة لكاتب بيبدأ كانت قادرة تخليه ميكملش وعلى فكرة لسه مأثرة على "حياة" لحد دلوقتي ان من وقت الفسخ لسه منزلتش مرة تانيه ، مش عشان حاجة غير اني حبيت أجل نزولها شوية بعد اللي حصل من الدار دي .

س/ هل هناك جوائز تم حصولك عليها من قبل؟

-لسه شوية بس أكيد مفيش حد ميتمناش ياخد جوائز في الحاجة اللي بيحبها 

س/ ما هي الرواية او العمل الأدبي المفضل لك بشكل عام؟

-كتير الحقيقة يعني لو قدرنا نحصرهم شوية ممكن نقول سارة للعقاد ، يوتوبيا لدكتور احمد خالد توفيق الله يرحمه ، تراب الماس لأحمد مراد .

س/ كونك كاتب ولديك جمهور من القراء والمتابعين هل تزداد عليك الواجبات اتجاه المجتمع ؟

-أكيد ، اني ازاي أقدر أوصل من خلال اعمالي اكتر كم من المعلومات اللي أقدر أفيد بيه الناس متبقاش مجرد قصة بتتحكي من غير معلومة مفيدة او من غير حتى اللي بيقرأ الرواية يستمتع بيها 

الكتابة رسالة ومسئولية كبيرة .

س/ لو أحد متابعينك قام بتعليق سلبي علي عمل من أعمالك ماذا يكون رد فعلك؟

-هتكلم معاه بشكل شخصي واعرف تعليقه ايه وابلغه كمان ان الشىء السلبي ده يتغير في اعمالي اللي جايه احنا بنتعلم من اخطاءنا مش بنعند فيها .

س/ اي نوع كتابة تفضل كتابته؟

-الفانتازيا والنفسي والرعب ، انا نفسي اكتب في كل الانواع .

س/ رسالتك لكل شخص يمتلك موهبة الكتابة؟

-أبدأ وأكتب واعرض اعمالك على دور النشر ومتوقفش كتابتك أبداً 

يمكن كتير مايعرفوش إن رولينج مؤلفة سلسلة هاري بوتر في البداية كانت بتعاني من أزمة كبيرة بسبب الطلاق والفقر، ومالقتش في الأول أي حماس من الناشرين لنشر روايتها. لكن لما وافقت دار نشر بلومزبري في لندن على نشر الرواية، أخدت مقدم 1500 جنيه استرليني بس، وتم نشر 1000 نسخة بس في البداية. وبعد كده الرواية حققت نجاح عالمي ساحق.

رولينج باعت حقوق الرواية اللي اتحولت لسلسلة أفلام شهيرة بدأت من سنة 1999. ومن شغلها الخاص، بقت أغنى ست في بريطانيا، بعد ما باعت أكتر من 200 مليون نسخة من سلسلة "هاري بوتر"، بالإضافة لحقوق تحويلها لأفلام سينمائية، وقدرت ثروتها بأكتر من 280 مليون جنيه استرليني.

س/ما رأيك في الآدب هذه الفترة بوجه عام ؟

-انا شايف انه متجهه بشكل عام لأدب الجريمة والفانتازيا بصورة كبيرة أوي وعمتاً وجود كتاب جدد ودور نشر أكتر دي حاجه بتدي مساحة للقارىء انه يشوف أكتر من نوع كتابه واكتر من اسلوب وبتدي فرصة للشباب اللي كنا بنتكلم عليها انها تكون موجودة بشكل كبير .

س/ هل تفضل الكتابة بالفصحى ام بالعامية؟

-انا أفضل الكتابة بالفصحى ، لكن بعض الاعمال بتكون محتاجه ان الحوار يكون باللغه العاميه عشان يكون اقرب للناس لكن طبعاً مينفعش السرد يكون عامية ، السرد بيكون روعة بالفصحى ومعانيها وصياغتها .

س/ ما رأيك في أسلوب كتابتك؟

-أعتقد إن القاريء هو اللي يقيم كتابتي ويقول رأيه فيها أفضل مني . 

س/ هل كتاباتك موجهة لفئة معينة؟

-لكُل الناس ، أنا نفسي أوصل كتاباتي دي لكل الفئات . 

س/هل تنوي القيام بعمل مشترك ام تفضل الاستقلال بمفردك في كتاباتك؟

-لو العمل يستحق وله هدف واضح وهيكون مع كتاب يضيفوا ليا ، ليه لأ وهكون سعيد كمان .

س/هل يحدث لك ما يطلقون عليه بلوك الكتابة وكيف تتخلص من هذا الشعور؟

-بتحصل طبعاً ، بتغلب عليه إني أفصل تماماً عن الكتابة وكأني فيوم مكتبتش كلمة .

س/ ما الذي يجعل الكاتب مميزاً عن غيره؟وكيف يطور من نفسه؟

-الأسلوب أهم أسلحة الكاتب ، القراءة بشكل واسع وفي جميع المجالات والانواع ومختلف الأساليب .

س/ هل مواقع التواصل الاجتماعي أضافت لك؟ وماذا أضافت؟

-ممكن تكون أضافت اننا نقدر نتواصل مع حبايبنا بشكل اسرع ودائم أكتر غير كدا فهي مواقع انفصال بالساعات اكتر منها تواصل .

س/ ما نوع الدعم الذي يحتاجه الكاتب المبدع المثقف في الوقت الراهن؟

-نقراله بمعنى إننا نحاول نبعد شوية عن الكُتاب المعروفين

المعرض ده مثلا جرب تجيب بشكل عشوائي مع كتاب كاتب مشهور ٣-٤ كُتب للكتاب الجدد

واعتبرها تجربة جديدة قادرة تخلي حلم كاتب بيبدأ تكون مسيرة كبيرة ومهمة 

س/ كيف يمكن أن يتوفر للكاتب التوازن بين العزلة المُلهمة وبين التفاعل والاحتكاك مع الطبيعة والحياة بشكل عام ومع الجمهور من جهة اخري من أجل الكتابة والخروج بعمل قوي؟

-نجيب محفوظ كان بيكتب وأفضل شخصياته كتبها على القهوة وهو بيتعامل مع الناس وبيرسم شخصياته من التفاعل والاحتكاك مع الناس والجمهور وبعدها كان بيقدر يكتب ويتخيل ويبدع

الاتنين بيكملوا بعض دايما والتجارب الحياتية مُلهمة لكتير من الكتاب

س/ هل تشارك في معرض القاهرة الدولي للكتاب 2025؟

بشارك برواية زهرة هاديس مع دار سين للنشر والتوزيع

صالة ٤ B4 جناح اخبار اليوم.