بنفتكر
كلمات احمد الهوارى
نفس السيناريو والحوار
بنحس ف العيد بالمرار
بنفتكر
اللى كانوا ف العيد معانا
ومش بيحلى الا بيهم
راحوا وسابونا لبكانا
واحنا لازم ندعى ليهم
بنفتكرهم !!!!!
هما اصلاً متناسوش
ولا لحظه هما عنا غابوا
كانت وشوشهم اجمل وشوش
والف ذكرى فينا سابو
بنفتكر
كل كلمه قالوها لينا
خوفهم علينا والنصايح
ياما ايديهم حضنت ايدينا
راحت معاهم اجمل روايح
بنفتكرهم
بعد منهم كل حاجه اتغيرت
حتى طعم الشهد مر
وسنينا منا اتبعترت
والعيد اهو يوم ومر
مع السلامه
يا احلى حاجه بعد منهم
ما عدش فيه اعياد خلاص
الغاليين اهو راح زمانهم
واحنا من غيرهم رخاص
رائعة رياح الدنيا
للشاعر احمد الهوارى
وبتطوطح يمين وشمال
كما الريشه
وبتمرجح كما القارب
على الامواج
وبتلوّم على حالى
على العيشه
وبتمنى الاقى ف وشى
ضربة سيف من الحجاج
لغاية امتى هتمناكى تحلوى
تعاملينى يا دنيا يا قاسيه
كما المخاليق
يوماتى عليا يادنيا بتستقوى
مين قالك عليا يادنيا
الفرحه مش بتليق
ف وشى مكشره دايماً
كإنك حوت لقانى ف وسط
بحر غريق
ودايما سودا زى الفحم
فى اجمل صوره مع غيرى
متلونه بمساحيق
وبتلجلج كإنى سائل ف انبوبه
تحركنى ايدين طفله ف اللفه
سهل بسيط كإنى قزم اعجوبه
ف عين الناس انا اطرش وف الزفه
على الهامش ف دنيا معايا مقلوبه
اكون مظلوم ف لحظه تقلب الدفه
وابان مبسوط ودمعه ف عينى مصحوبه
ومن جوايا انا بنزف وبتصفى
وماشى بعيط وبتلوى من الاوجاع
وبصرخ صرخه ف جبال بتتفتت
وجوايا يجى الف صراع
وافكار تخلى عقول الكل تتشتت
ومش وحدى اللى متحير
دا فيه اجماع
ليه الدنيا على كتير منا بتغتت
ورغم الريح الا انى ناصب طولى
مفيش نخله من الريح ف يوم وطت
وبتطوطح ف يوم امشير واخد حقه
ف صحرا مفيش
ولاجذع منصوبلى
مفيش قدامى الا انى
اسلم نفسى للرياحين
و أواجه كل اللى مكتوبلى
ولازم ابان قصاد الناس
بانى شجاع
وانى مثالى وكل الناس تشوف نبلى
وبتمنى رياح الدنيا دى تسكن
وتهدا
والاقى صبرى داكله محسوبلى
