نادين لـ العاصمة الآن: “بلعب شخصية ندى في رقم سري وهي قضية المسلسل”

حوار/ ياسر خالد

كشفت الفنانة نادين عن ملامح شخصيتها في مسلسل رقم سري الذي تقوم ببطولته الفنانة ياسمين رئيس، والمقرر أن ينطلق عرضه غدًا السبت 9 نوفمبر عبر قناة dmc وdmc دراما.

وصرحت نادين لموقع العاصمة الآن أنها تلعب في المسلسل شخصية ندى، كاشفة عن علاقتها بـ ياسمين رئيس خلال أحداث العمل، حيث قالت: “أنا وياسمين رئيس بنشتغل مع بعض”، موضحة أنها قضية المسلسل.

نادين: “شايفة إن المنصات واخدة حقها دلوقتي أكتر من التليفزيون”

وتحدثت نادين عما إذا كان عرض مسلسل ليه لأ 3 على شاشة التليفزيون خلال رمضان الماضي، وذلك بعد عرضه عبر منصة شاهد الصيف قبل الماضي، قد أتاح الفرصة لمشاهدته بشكل أكبر، خاصةً أن جمهور التليفزيون أعرض من جمهور المنصات.

وعن ذلك قالت: “لأ بالعكس شايفة إن الاتجاه دلوقتي بيروح للمنصات، الناس ماعندهاش طاقة إنها تلتزم بمواعيد لمسلسلات، بتتفرج لما تعوز، وهروبًا من الإعلانات، فشايفة إن المنصات واخدة حقها دلوقتي أكتر من التليفزيون”.

نادين: “أغلب الأعمال اللي عملتها كانت أوف سيزون”

وحول ما إذا كان يشغلها عرض أعمالها داخل رمضان، أوضحت نادين: “كل اللي عملته كان أوف سيزون تقريبًا، وخليني أقولك إن كل اللي نزل رمضان كان صدفة، مثلًا خللي بالك من زيزي كان من الأول رمضان، عائلة جيجي عملته بعده كان أوف سيزون من الأول”.

وأردفت: “وبعد كده لما عملت مين قال وأولاد عابد كانت صدفة لذيذة جدًا إنه أولاد عابد كانوا عاملين حسابهم إنه رمضان، بس بعد كده قرروا إنه هيبقى قبل رمضان، واتعرض في محطات أكتر فأخد حقه في فترة مافيهاش سباق رمضان”.

وأكملت نادين: “ومين قال كان المفروض بعد رمضان، عجبهم أوي قاموا حاطينه في رمضان، وماكنش أساسًا في خريطة رمضان، فعجبهم أوي قالوا ده لازم ينزل رمضان، فمين قال نزل رمضان ده صدفة”.

وأوضحت: “ليه لأ كان برضو معمول حسابه إنه بره رمضان، كون إنهم عادوه دي كانت صدفة رمضان اللي وراه، لكنه كان أصلًا قبل رمضان”.

نادين: “أنا مش مرتبطة برمضان والحاجة اللي بتعجبني بعملها”

وأشارت نادين: “أنا مش مرتبطة برمضان، الحاجة اللي بتعجبني بعملها وأيًا كان هتتعرض قبل، بعد، أثناء رمضان، بس طبعًا أنا بفضل خارج رمضان، أنا بحب الأوف سيزون أكتر بكتير، ماحبش العرض في رمضان لأن الحاجة مابتاخدش حقها، بيبقى فيه تخمة مسلسلات”.

وتابعت: “رمضان عامل زي الموضة، يعني معروف إن رمضان فيه 50 مسلسل، فأصبح شكل مشهور، هل بقى الـ50 بيتشافوا؟، لأ، الناس بتركز بحكم العادة مع حد، اتنين، تلاتة، ما أنت برضو عندك طاقة معينة”.

وأضافت: “فيه ناس تقولك أنا هتفرج على بقيت الحاجات بعد رمضان، تبقى اتحرقت بقى، لما اتعرضت في رمضان اتحرقت بنهايتها، فأنت بتاخد حاجة برضو بالفعل متشافة واتحرقت، مش شايفها مع الناس”.

ولفتت نادين: “بفضل الأوف سيزون لأن مافيهوش مسابقة، بس رمضان الناس بالنسبة لها ده مسلسل رمضان، يعني لازم الوهلة الأولى الناس بتعتقد إن ده أحسن خبر، بس هو في الحقيقة مش أحسن خبر خالص”.

نادين: “لو جت لي فرصة تانية في السينما بعد صعيدي رايح جاي هدرسها”

وعما إذا كانت ستشارك في أعمال سينمائية قريبًا، كشفت أنها لم تتلقَ عروضًا سينمائية، قائلة: “ماجاليش حاجة سينما”.

وبشأن ما إذا كانت تتمنى العودة للسينما، أتمت الفنانة نادين تصريحاتها: “ماعملتش في السينما غير عمل واحد بس صعيدي رايح جاي، وهو كان نجح وبطلت بعدها، لكن ماجتليش فرصة حاجة تانية، فلو جت هدرسها طبعًا”.